اضلوعي من الحزن حتن وناحن
اوحمامات الوكت قرن وناحن
انه الزعلان من عنده وناحن
احجي اوياه بلكي يرد عليه
كلبي لو تريده يصير بيمان
ودور عالصدك ولكاه بيمان
لو تدري ابوزن بلواه بيمان
ابتسم للناس والعله خفيه
اشاكف دوم ياظيمي بجورك
واذا مو حضن جفك بجورك
حزن كلبي شعر شعبي بجورك
يظل يكتب لمن تنصاع اليه
اشفافك شربت المله منلهيل
اوحلاتك بالكلام اتصف منلهيل
اشمالك بطلت خايب منلهيل
الهوه مشتاك نفسك ظل اليه
تعال اوياي للمله وشربك
ابد ما يطيب كل زادك وشربك
اذا المستور كل طبعك وشربك
يزيل الميل والعله الخفيه
يايام الصبه هلن وعوداي
علام انسيت ياصاحب وعوداي
ذبل جفني عكب شخصك وعوداي
اوكمت افتل حبل وصلك بديه
يلولي الوكت ياخلي ولولاك
على نابه احس يصرج ولولاك
امحلت دنياي مجبوره ولولاك
اصبحت نار السمه اوماي الوطيه
ظل مهموم بيت الشيب رسنه
ولا فد يوم بر العمل رسنه
ابد منتوب احنه امنين رسنه
شهد كل الوقايع رد اذيه
ابكتاب الله يمينك والنبيهه
اوحجايه الضد تبين ونبيهه
الماهر ما يفهمك والنبيهه
افهمك من ترف شفتك عليه
تنادي ما اظن فادك منيداك
اودموعي خربطت غزلي منيداك
شامت يركض البابك منيداك
تكلي استح علي كلك اذيه
موضوع: عناقيد / ابوذيه 
الأربعاء يوليو 22, 2009 12:03 am