عين الشمس

عين الشمس

لو ما
ضواهه الشمس
ما تنعـرف
وليله النجم
ما فارك احضان
السمه
والظلمه
ماتمشي سوه
وي الضوه
ولا مره
عين اشتهت
طور العمـه
الموس
من يبلع شفرته
الشــــــعر
يضيع حلكه
الحيل
منه يقاســمه
ومن ينكسر
ظهر الجــــرح
بي دوه
اتكوم العوافي
اتكوم
تنصب ماتمـه
وانت ياكوكب
غريب ابلا حزن
لاذ بيك الجرح
لا بيك احتمه
ولا مره طاحت
دمعتك وي الدمـه
ولامره جوعك
صاح ياحامي الحمه
ولامره جيبك
طارلوهب الهــوه
ولا ساعه تذكر
بالزعل متخاصمه
احنه الزعل
وي الجرح
يصبح امـل
تتمرجح
اصوات الشعب
بي ملحمه
اوجهي من يحضن
صوركم ظل يدور
ظل يدور
 وانه ادور
ابوجه غيــري
اوجه غيري
ظل يدور
ابظل مصيري
انه اوصيه
اعله وجهي
واســـتغيث
ما يهمه
هو وصاني
اعله غيـري
من قفل
عيني دربكم
من يطيــــح
ومن تطيح اعيوني
مفتاح الدربكـم
اجدامي تندهكم
حوافر وي مسيري
وظل يدور
وانه ادور ابوجه
غــــــيري
حكمة الساني
محـــــطه
ابلايه ناس
ومن صفنتي
اتشوف ناس
ابلا محطه
والبشر
تاكل شـــــــكلهه
ابلايه روح
ابلا ضميرالمـاي
بالصخره تغطه
العندي عدكم
ما تغــــير
من فكركم
بس لعب بالساحه
خطه ابلايه خطه
ولا ركد مايه
وصفه
حتى انه اخبطه
ولا قوانين اونظام
اللي يربطــــــــــه
ولا طفل
حتى انه اوجهه
وانه ابســطه
لاهي صعبه
ولا هي سهله
ولاهي غلطه
العقل من ينسجن
ماينعقــل
من البدايه ايكوم
كل فــكره يخرطه
يصبح الشــارع هويته
وبي يغني
ودفتر الماضي
اعله متـنه
يصير جنطه
الدنيه من اتمد
نهــر لعيونهه
من الحزن
تمطر بواجي
ابلا دمع
تتحد اصواتهه
ابصــوت الفقير
تتشلبه حيطان
السفر ما تنسمع
لا مسه العدهه
اليسرني اولا صبح
اولا نهار اوليل
عـــدهه الينبلع
وببنادم جثيره اطباع
تولـد من طبع
طبع يفزع
بيه لو تفــزع ربع
وطبع يتجه
اعله روحه ابلا ضلع
ومن يخاف
اتصير خطواته
ســـبع
اومن يشد
وي الوكت
لوشدعليه
يصير شريانه
حبل ما ينكطع
بس وجه ثاني
لبس من ينصدع
ايدوس
كلب المستحه
او ما يردع
ما يفرق
بين صبخه
وطين حري
وين ما راد الحجي
بي ينزرع
والطبع عنده
تنشطر ميّة طبع
نهر يركض
بس وراه ما ينطبع
عين دنيه ومن تطمهه
اتصير عين
ميت عين
التمشـي غفله
اوميت عين
التولد وماتنكطع
خلي عينك
تشبح ابعين الشمس
وصبر دقايق
حلهه من كونك
سبع