زهيريات العتاب

لوراد يزعل يجن يلف الوكت صاحبــــــــه
دربي المشيته صعب ماكو صدك صاحبه
مد خنصر اليستحي منه يزاعل صاحبـه

طشرت عمري اله كام اعله كيفه يلــم
انخاه بلجن يحن يزجرني حيل ويلـــــم
بيه الجرح ماغفه ماغير كلبي يلــــــــم
ومسيت مثل اليصد سهم العدا صاحبه
----------------------------------------------
ياابني شوكي الك يابني اكبر سهـم
الفرح لولا اجه اتوقع يردلك سهــــــم
اتشكل ابحيلك عزم ويه اخوتك سهم

ظل انتجيله ابصدك والحك الك جيبه
الغني موبس ثري بالمال تارس جيبه
الشهم ما ينغلب بالطيب لابس جيبه
الحاصل صفاتن صدك بعيون لده سهم
--------------------------------------------
بجفاك انه اهملت مو دمع من عينـي
يادنيا كافي غدر والحالتي عينــــــي
تركيني مده احس عن الحرب عينــي

اضلوعي اترضرضن مابيه اتحمـــــــــل
حمليني بس السنه والعمري اتحمل
افلست مامش اخو وبعيد اتحمـــــــل
من لنهم عجارب صفر ياربي عينــــي
-------------------------------------------
يناهي بد كلامك دخل كلبي وكــــرص
والرايد امازحي اتولاني بوس وكــــرص
تنور كلبي صفه الهم يستو كــــــــرص

امجازه حل الصدك هذا كلامي وجـــب
دشداشه لبس الوكت لازيج بيهه وجب
ودواليبه امشرعبه تاخذ ابحالي وجــب
وسواليفه امصفطه اسنون مشط وكرص
--------------------------------------------
جاريت غصبن علي اهوه الخيالك وهم
ياماكتلني الهجر الملكاك افكر وهـــــم
للناس ازرع وفه وحمل محبه وهـــــــم

جازوني بارده فعل صارو الي عـــــــدوان
اطرح اشجازه الوكت بيك اشعمل عدوان
اتبع بكايا الضعن اشكد علي عــــــــدوان
تاليهه وكتي زعل ابفاس طكني وهــــم
-----------------------------------------
بيات ردت الغنه ينطيني عمدن ســــــــكه
وصفيت بيده زبد امطشر يلمني ســــــــكه
انصح الرايد نصح والمايريده ســــــــــــــــكه

حط ايدك اعله الذكي يستاهل اسمه شطر
كلساع حمده وجل مابين عجز وشـــــــــطر
محتار من دنيتي انه شلاهي شـــــــــــــطر
شاتلني صاحب وفي انتظر منه ســـــــــكه
----------------------------------------------