ابواب الابوذية

تبعد والبعد تدريه مـــــــاذي
الوج اوماتكول اشبيك ماذي
اظل اتلاوه وي الظيم ماذي
وستجن وصفه وي الــعليه

الكلب يشكيك صدك دايمنه
عمر سدر تظل الفي دايمنه
ابروض الشور اطلب دايمنه
اداريهه ابسكاة العين هيـــه

عليه احســـــاب انطر مقبلانه
اذا يغفل اوتلتف مـــــــــقبلانه
ارفض من تســــاومني مقبلانه
انوخذ حكي اجيبه احكوك اليه

ادعي الله اوفيكـــــــم مكاني
فرحت اوغنه من يمه مكاني
طبعي ما امل طبعي مكاني
ابيت الله اويكـول ابعد عليه

احس دمك شبيه الدمـــــي داحس
والك خوه ابضمير احشاي داحس
لون غبراء كــــــادت يوم داحس
مثلهه الحزن كاد اجــــفوف اديه

مو حنه اعله راسي الوكت حطين
بنه عـــــش الطيور الشؤم حطين
نوايب دهـــــري بالمكروه حطين
داري والسمــــــه انطبكن سويه

اشوفه اتكول كل الكون جمعه
ودعي الله تلمني اويــاه جمعه
يارقم الرهــــــــــم وياه جمعه
صفر رقمي اوالف رقمه عليه

كلامك لو حجيته اوياي رمان
كلب ابيض الك وجهين رمان
عليك اشبيك صافن ليش رمان
حسابك والســـهم ارميه عليه

على راسي طيور الشؤم حسن
من ومية اعيوني ابسـاع حسن
اكله الوكـــت يوم اوياي حسن
يرد يلتاف ذب طركاعـــه اليه